You are here
Home > कला > ‘छक्का पञ्जा २’ ले तोड्यो बाहुबलीको रेकर्ड

‘छक्का पञ्जा २’ ले तोड्यो बाहुबलीको रेकर्ड

१२ आश्विन २०७४, बिहीबार ११:००

काठमाडौं |

फूलपातीको अवसर पारेर देशभर प्रदर्शनमा आएको सिनेमा ‘छक्का पञ्जा २’ को शुरुवाती दिनको कारोबार नै आक्रामक रहेको छ ।  शुरुवाती दिनमा दर्शकको उपस्थिति र टिकटहरु बिक्री भएको ‘छक्का पञ्जा २’ ले नेपाली सिनेमाको बजारमा भारतीय सिनेमा ‘बाहुबली’ले राखेको रेकर्डसमेत तोडेको छ ।

देशभरका सय भन्दा धेरै हलहरुबाट एकसाथ प्रदर्शनमा आएको ‘छक्का पञ्जा २’ ले क्युएफएक्समा सबैभन्दा बढी २६ शो पाउने सिनेमाको रेकर्ड पनि आफ्नो नाम गरिसकेको छ ।

सिनेमाले बुधबार मोफसलमा रात्री शोहरु बाहेक ५७ लाख रुपैयाँको कारोबार गरेको छ । तर उपत्यका भित्रको कारोबार भने बाहिरएको छैन । बिहीबार बेलुकासम्म सिनेमाको कारोबार बाहिरिने वितरक नरेन्द्र महर्जनले जानकारी दिए ।

यतिबेला सिनेमाका कलाकारहरु हल–हलमा पुगेर प्रत्यक्ष रुपमा दर्शकलाई भेटेर सिनेमाको बारेमा प्रतिकृया बटुल्ने र दर्शकसँग खुशी साट्ने काम गरिरहेका छन् ।

दीपाश्री निरौलाको निर्देशनमा बनेको ‘छक्का पञ्जा २’ गएको वर्षको रेकर्ड ब्रेकर सिनेमा ‘छक्का पञ्जा’को सिक्वेल हो । ‘छक्का पञ्जा २’ मा  दीपक राज गिरी, केदार घिमिरे, जितु नेपाल, प्रियंका कार्की, वर्षा राउत, स्वस्तीमा खड्का लगायतका कलाकारहरुको मुख्य भूमिका छ ।