You are here
Home > प्रशासन > महेन्द्रनगरको कर्फ्यू हटाइयो, सिडियो, एसपी र डिएसपी हटाइएपछि अवस्था सामान्य बन्दै

महेन्द्रनगरको कर्फ्यू हटाइयो, सिडियो, एसपी र डिएसपी हटाइएपछि अवस्था सामान्य बन्दै

८ भाद्र २०७५, शुक्रबार १२:२५

महेन्द्रनगर – कञ्चनपुरको भीमदत्तनगर–२ की १३ वर्षीय बालिका निर्मला पन्तको बलात्कारपछि हत्या हुँदा समेत प्रहरीले वास्तविक हत्यारा पत्ता लगाउन नसकेको भन्दै महेन्द्रनगरमा जारी आन्दोलनका क्रममा झडप भएपछि स्थानीय प्रशासनले बिहीबार साँझ पाँच बजेदेखि जारी गरेको कर्फ्यू हटाइएको छ।

झडपमा मानवीय क्षति हुनसक्ने अवस्था आएपछि जिल्ला सुरक्षा समिति बैठकले महेन्द्रनगर बजार वरपरका क्षेत्रमा कफ्र्यु जारी गरेको थियो। विहानैदेखि कफ्र्यु हटाइएसँगै जनजिव सहज भएको छ। बिहीबारको आन्दोलनले उग्ररुप लिएसँगै  विहानैदेखि महेन्द्रनगर बजार क्षेत्रमा ठुलो संख्यामा सुरक्षाकर्मी परिचालन गरिएको छ।

बिहीबार जिल्ला प्रहरी कार्यालयअगाडि प्रदर्शनकारी र प्रहरीबीच करिब दुई घन्टा झडप भएको थियो। झडपका क्रममा प्रहरीले रहरीले १० राउन्ड गोली हानेको थियो भने करिब एक सयभन्दा बढी अश्रुग्यासको सेल प्रहार गरेको थियो। आन्दोलनकारीले पनि प्रहरीमाथि ढुंगामुढा प्रहार गरेका थिए। प्रदर्शनमा प्रहरी र आन्दोलनकारीबीच झडप हुँदा गोली लागि ३ जना गम्भीर घाइते भएका छन् भने थप १० जना सामान्य घाइते छन्। घाइते हुनेमा दुई जना प्रहरी पनि छन् ।

जिल्ला प्रशासन कार्यालय उत्तरतर्फ ट्राफिक चोकमा प्रहरीले चलाएको गोली लागेर कञ्चनपुर भीमदत्त नगरपालिका–१८ का १७ वर्षीय अर्जुन भण्डारी घाइते भएका थिए। उनको बायाँ खुट्टामा गोली लागेको छ। महाकाली अञ्चल अस्पतालमा प्राथमिक उपचारपछि भण्डारीलाई थप उपचारका लागि सेती अञ्चल अस्पताल पठाइएको छ।

घटनामा अन्य पाँच जना आन्दोलनकारी घाइते भएका छन्। घाइते हुनेमा तेज भट्ट, कृत पनेरू, मनोज बुढा, सरोज खड्का र सन्तोष कठरिया छन्। आन्दोलनकारीको ढुंगा प्रहारबाट प्रहरी हबल्दार हर्कबहादुर पाल र जवान महेश भट्ट घाइते भएका छन्। घाइतेको महाकाली अञ्चल अस्पतालमा उपचार भइरहेको छ।

भीमदत्त नगरपालिका–२ खोल्टीनिवासी १३ वर्षीया निर्मला साउन १० गतेदेखि बेपत्ता थिइन्। साउन ११ गते उनको शव भीनपा– १९ को एक उखुबारीमा फेला परेको थियो। घटनाको तीन सातापछि प्रहरीले आइतबार भीमदत्तनगरपालिका–१९ बागफाँटाका ४१ वर्षका दिलीपसिंह विष्टलाई हत्याका अभियुक्त भन्दै सार्वजनिक गरेको थियो। मानसिक अवस्था कमजोर भएका बिष्टलाई हत्यारा भनी सार्वजनिक गरेपछि आन्दोलन झन् चर्किएको थियो।

यस अघि विहीबार गृहमन्त्रालयले कञ्चनपुरको प्रमुख जिल्ला अधिकारी, प्रहरी प्रमुख र एक डिएसपीलाई फिर्ता बोलाएको थियो । मन्त्रालयमा बिहीबार बसेको बैठकले १३ वर्षीय बालिका निर्मला पन्तको बलात्कारपछि भएको हत्याको विषयमा आन्दोलन चर्किरहेका वेला प्रमुख जिल्ला अधिकारी कुमारबहादुर खड्का, प्रहरी प्रमुख एसपी डिल्लीराज विष्ट र प्रहरी नायब उपरीक्षक (डीएसपी) ज्ञानबहादुर सेट्ठीलाई फिर्ता बोलाइएको हो ।

गृहले नयाँ सिडियोमा र प्रहरी प्रमुखमा क्रमश तारानाथ अधिकारी र कुवेर सिह कडायतलाई पठाएको छ । गृहले पन्तको बलात्कारपछि हत्या भएको घटनाको छानबिन गर्न सह–सचिव हरिप्रसाद मैनालीको नेतृत्वमा ५ सदस्यीय छानबिन समिति गठन गरेको छ ।

  • 45
    Shares