You are here
Home > समाचार > चितवन राष्ट्रिय निकुञ्जमा ‘अप्रेसन महाहन्ट’ शुरु, महाहन्टमा कुकुरसमेत परिचालन

चितवन राष्ट्रिय निकुञ्जमा ‘अप्रेसन महाहन्ट’ शुरु, महाहन्टमा कुकुरसमेत परिचालन

६ पुष २०७५, शुक्रबार १३:०१

काठमाडौं- चितवन राष्ट्रिय निकुञ्जमा ‘अप्रेसन महाहन्ट’ बिहीबारदेखि शुरु भएको छ ।दुर्लभ वन्यजन्तु एक सिङ्गे गैँडा, बाघ जस्ता जनावरको चोरी शिकार नियन्त्रण अभियानमा महाहन्ट महत्वपूर्ण मानिन्छ ।

निकुञ्जका प्रमुख संरक्षण अधिकृत वेदकुमार ढकालका अनुसार महाहन्टका लागि विशेष फौज बाहिनीबाट खटिनका लागि एक गुल्म फौज आएका छन् ।  विशेष फौज र निकुञ्जमा रहेका सेनालाई संयुक्तरुपमा तालिम दिएपछि फौज कार्यक्षेत्रमा खटिएको उनले बताए ।

बाहिनीका सुरक्षाकर्मीसँगै निकुञ्ज कर्मचारी र सुरक्षार्थ खटिएको श्री बटुक दलगणका सुरक्षाकर्मी पनि महाहन्टमा रहेका छन् ।

नियमित सुरक्षाका अतिरिक्त महाहन्टमा विशेष सुरक्षा फौजले निकुञ्ज कर्मचारी, सरोकारवाला संरक्षणमा सम्बद्ध निकायसँग समन्वय गरी निकुञ्जको विशेष सुरक्षा गर्ने छ ।

महाहन्टका क्रममा कुकुरसमेत परिचालन गरिँदैछ भने हात्ती, गाडी, मोटरसाइकल, साइकल, पैदल, डङ्गागस्ती हुँदैछ । हाल भएका ५७ वटा सुरक्षा पोष्टका अतिरिक्त ठाउँमा रातको समयमा पनि सुरक्षाकर्मीले सुरक्षा दिने छन् ।

वर्षाद सकिएपछि हिउँदको समयमा निकुञ्जको भित्री भाग र मध्यवर्ती क्षेत्रभित्र पर्यटन मार्ग खुल्ला हुने, पात झरेर जङ्गल उजाड हुने, खोला घटेर सहजै मानिस वारपार गर्नसक्ने हुनाले यो समयलाई चोरी शिकारको दृष्टिले अति संवेदनशील समय मानेर विगत केहीवर्ष यतादेखि महाहन्ट सञ्चालन गरिँदै आएको बताईन्छ ।

चितवन राष्ट्रिय निकुञ्जमा सुरक्षार्थ खटिने सेनाले विसं २०६७ सालबाट अप्रेसन हन्ट सञ्चालन गर्दै आएकोमा विसं २०७१ सालबाट भने महाहन्ट सञ्चालन गर्दै आएको छ । पुस महीनाबाट वर्षाद शुरु नभएसम्म महाहन्ट जारी हुन्छ

  • 8
    Shares