You are here
Home > राजनीति > सेनालाई मन्त्री क्वार्टरबाट हटाउन प्रस्ताव

सेनालाई मन्त्री क्वार्टरबाट हटाउन प्रस्ताव

१२ श्रावण २०७६, आईतवार १७:१९

काठमाडौँ– गृह सचिव प्रेमकुमार राईले नेपाली सेनालाई मन्त्री क्वार्टरको गेटबाट हटाउनुपर्ने धारणा राखेका छन् । उनले  भन्सार नाकाहरुबाट सशस्त्र प्रहरीलाई हटाएर नेपाल प्रहरीलाई जिम्मा दिनुपर्ने पनि धारणा राखेका छन् । 

संघीय संसदको राज्यव्यवस्था तथा सुशासन समितिमा आइतबार भएको ‘नेपाल प्रहरी र प्रदेश प्रहरीले सम्पादन गर्ने कार्यको सञ्चालन, सुपरीवेक्षण र समन्वयको सम्बन्धमा व्यवस्था गर्न बनेको विधेयक’माथिको दफाबार छलफलका क्रममा सचिव राईले यस्तो बताएका हुन् । 

व्यक्ति, नीजि संघसंस्था, आयोजना, औद्योगिक घराना र कुटनीतिक नियोगमा राज्यका सुरक्षाकर्मी खटाउँदा उनीहरुबाटै सुरक्षा कर लिनुपर्ने पनि राईले बताए । 

 गृहसचिव राईले राज्यको दायित्व सबैको सुरक्षा गर्नु रहेपनि त्यसका लागि राज्यबाट सुरक्षाकर्मी खटाएपछि उनीहरुबाट सुरक्षा कर लिनेगरी कानुन बनाउनुपर्ने बताए । 

विधेयकको दफा ३ मा नेपाल प्रहरीको काम कर्तव्यको व्यवस्था रहेको छ । छलफलको क्रममा सचिव राईले सरकारले सुरक्षा प्रवन्ध मिलाइदिने तर नाफा निजी क्षेत्रले मात्र लिने गरेकाले त्यसलाई परिवर्तन गर्दै उनीहरुबाटै सुरक्षा कर लिन उपयुक्त हुने धारणा राखे ।

 छलफलमा भाग लिदै सांसद नवराज सिलवालले बेलायत र अमेरिकी दूतावासमा सय भन्दा बढी सुरक्षाकर्मी खटाउने गरिएको भन्दै उनीहरुलाई के कति कारणले खटाउने गरिएको हो भन्ने जानकारी गराउन माग गरे । 

 सांसद पम्फा भुसालले औद्योगिक क्षेत्रको सुरक्षामा १५० जनासम्म सुरक्षाकर्मी खटाउने गरिएको भन्दै त्यतिधेरै सुरक्षाकर्मी खटाउनुपर्ने आवश्यकता रहेको हो वा होइन भन्दै प्रश्न गरिन् । 

यसैगरी सांसद झपट रावलले देशभित्र लगानी भएका सवै आयोजना र उद्योगहरुको सुरक्षा जिम्मा सरकारको दायित्व भएको भन्दै त्यसरी राज्यले दोहोरो कर लिन नमिल्ने बताए ।