You are here
Home > प्रशासन > ललिता निवास जग्गा प्रकरणः अख्तियारले बोलायो अनुसन्धानका लागि ५८ जनालाई

ललिता निवास जग्गा प्रकरणः अख्तियारले बोलायो अनुसन्धानका लागि ५८ जनालाई

१८ भाद्र २०७६, बुधबार ०७:५०

काठमाडौं-ललिता निवास जग्गा प्रकरणमा अनुसन्धानका लागि ५८ जनालाई ७ दिनभित्र आयोगमा हाजिर हुन अख्तियार दुरुपयोग अनुसन्धान आयोगले सूचना जारी गरेको छ ।

बुधबार पत्रिकामा सूचना प्रकाशित गर्दै अख्तियारले उनीहरुलाई ७ दिनभित्र अख्तियारमा हाजिर हुन भनेको हो। उक्त अवधिमा सम्पर्क गर्न नआए कानूनबमोजिम कारवाही हुने पनि सूचनामा उल्लेख गरिएको छ ।

‘तत्कालीन सरकारले प्रचलित कानूनबमोजिमको मुआब्जासमेत दिई अधिग्रहण गरिलिएको साबिक हाँडीगाउँ मौजा हा.नं.४५६ को लगत भिड्ने ललिता निवास क्याम्पभित्र पर्ने काठमाडौं, बालुवाटारको २९९ रोपनी सरकारी जग्गा मालपोत कार्यालय, काठमाडौं, डिल्लीबजारका कर्मचारीहरु समेतको मिलेमतोमा विभिन्न मितिमा गैरकानुनी तरिकाले व्यक्ति विशेषलाई फिर्ता दिई अनाधिकृत व्यक्तिहरुलाई जग्गाधनी र मोही कायम गरी भ्रष्टाचार गरेको भन्ने समेत व्यहोराको उजुरीको अनुुसन्धानको सिलसिलामा तपाइँसँग केही बुझ्नुपर्ने भएकोले यो म्याद सूचना प्रकाशित गरिएको छ,’ अख्तियारद्वारा बुधबार प्रकाशित सूचनामा भनिएको छ ।

त्यस्तै उक्त सूचनामा अख्तियारले ती व्यक्तिहरुलाई आयोगको अनुन्धान महाशाखामा सम्पर्क गर्न पनि भनेको छ ।