You are here
Home > समाचार > यात्रुहरुको सुरक्षा गर्नु पहिलो कामः आइजिपी खनाल

यात्रुहरुको सुरक्षा गर्नु पहिलो कामः आइजिपी खनाल

१२ आश्विन २०७६, आईतवार १६:००

काठमाडौं- प्रहरी महानिरीक्षक (आइजीपी) सर्वेन्द्र खनालले देशभर यात्रा गर्ने यात्रुहरुलाई सुरक्षित रुपमा गन्तव्यमा पुर्याउनु नेपाल प्रहरीको पहिलो प्राथमिकता भएको बताएका छन्।

महानगरीय ट्राफिक प्रहरी महाशाखा रामशाहपथद्वारा आइतबार गोगंबुस्थित नयाँ बसपार्कमा ‘सडक सभ्यता हाम्रो चाहना सुरक्षित यात्राको सबैमा शुभकामना’ कार्यक्रमको ट्राफिक नियम सम्बन्धी जनचेतनामूलक अडियो जिङ्गल बजाई शुभारम्भ गर्दै प्रहरी महानिरीक्षक खनालले सो कुरा बताएका हुन्।

प्रहरी महानिरीक्षक खनालले ट्राफिक व्यवस्थापनका लागि प्रहरी निरन्तर रुपमा खटिएको उल्लेख गर्दै ट्राफिक प्रहरी पोष्ट स्थापना, विभिन्न सरोकारवाला निकायसँग समन्वय गरी समुदाय-प्रहरी साझेदारी अन्तर्गत जनचेतनामूलक कार्यक्रम गर्ने लगायतका कार्य गरिरहेको बताए ।

महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक भिमप्रसाद ढकालले स्वागत मन्तव्य व्यक्त गर्नुभएको उक्त कार्यक्रममा नेपाल यातायात व्यवसायी राष्ट्रिय महासंघका महासचिव सरोज सिटौला, नेपाल यातायात स्वतन्त्र मजदुर संगठनका अध्यक्ष भिमज्वाला राई र ल्होत्से बहुउद्धेश्य प्रालिका अध्यक्ष दिपक कुँवरले यातायात क्षेत्रमा आवश्यक सुधार गर्नका लागि आ(आफ्नो सहयोग सहितको प्रतिबद्धता व्यक्त गरेका थिए ।

साथै राष्ट्रिय दोहोरी प्रतिष्ठानका अध्यक्ष बद्री पङ्गेनी, प्रसिद्ध गायिकाहरु पूर्णकला बिसी, राधिका हमाल लगायतले सुरक्षित यात्राका सन्देश बोकेका जनचेतनामूलक गीत प्रस्तुत गरेका थिए ।

सोही अवसरमा प्रहरी महानिरीक्षक खनालले करिब ३५ वर्षदेखि सवारी चालकको रुपमा काम गरी हालसम्म सुरक्षित यात्रा गराउने देशभरका असल चालकका प्रतिनिधिहरु ७ जनालाई प्रमाणपत्र तथा नगद पुरस्कार प्रदान गरेका थिए।