हतियारसहित पक्राउ परेका कांग्रेस कार्यकर्ता धरौटीमा रिहा, एसपी हेडक्वार्टर तानिए


Wednesday, 17 May, 2017 12:00 AM

काठमाडौं -कुनै समय थियो हातहतियार तथा लागूऔषध जस्ता अवैध वस्तुहरुसहित आरोपी पक्राउ गर्ने प्रहरी अधिकृत तथा जवानहरु पुरस्कृत हुने गर्दथे । तर, अहिले समय फेरिएको छ । पछिल्लो केही समययता नेपाल प्रहरीमा राजनीतिक दलहरु हावी हुने र प्रहरी महानिरीक्षक तिनै राजनीतिक दलका नेताहरुको आदेशपालक हुँदा फिल्डमा खटिएका प्रहरी अधिकारीहरुको मनोबल खस्कँदै गएको पाइएको छ । राम्रो काम गर्दा राजनीतिक दलका नेताहरुको इशारामा दण्डित हुनुपर्ने र अनावश्यक तनाव झेल्नुपर्ने र प्रहरी नेतृत्वले अपराध नियन्त्रणमा दत्तचित्त भएर लागिपरेका आफू मातहतका अधिकारीहरुको संरक्षण नगर्ने अवस्थाको सिर्जना भएपछि इमान्दार र निष्ठावान् प्रहरी अधिकारीहरु निराश बन्दै गएका छन् । पछिल्लो समय त्यस्तै प्रकृतिको घटना धादिङमा पनि घटेको छ । करिब एक वर्षदेखि धादिङ प्रहरीको कमाण्ड सम्हालेयता धादिङमा अपराध नियन्त्रणमा उल्लेख्य भूमिका खेलेका धादिङ प्रहरी प्रमुख एसपी शरद खत्रीलाई राजनीतिक दबाब र प्रभाव इन्कार गरेको आरोपमा आज (बुधबार) प्रहरी मुख्यालय तानिएको छ ।

गत वैशाख २९ गते धादिङको खनियाबास–५ बाट प्रहरी  चेकजाँचको क्रममा एक थान पिस्तोल, त्यसमा लाग्ने ३ राउण्ड गोली र एक थान खुकुरीसहित पक्राउ परेका युल तामाङ र जयकुमार तामाङलाई छोड्न नमान्दा एसपी खत्रीलाइ कारबाहीका लागि प्रहरी मुख्यालय तानिएको हो । प्रहरी मुख्यालय स्रोतका अनुसार नेपाल प्रहरीका आईजीपी प्रकाश अर्यालले बुधबार दिउसो ४ बजेभित्र प्रहरी मुख्यालयमा हाजिर हुन उर्दी जारी गरेपछि डीएसपी दीपेन्द्र पञ्जियारलाई चार्ज बुझाएर एसपी खत्री काठमाडौंस्थित प्रहरी मुख्यालयमा हाजिर भएका छन् । धादिङ प्रहरी स्रोतका अनुसार हतियारसहित पक्राउ परेका युल तामाङलाई मुद्दा नचलाई छोड्न राजनीतिक नेतृत्वले दिएको अनावश्यक दबाब नमान्दा उनी प्रहरी मुख्यालय तानिएका हुन् । 

हतियारसहित पक्राउ पर्नेमध्येका युल तामाङ स्थानीय तहको निर्वाचनमा नेपाली कांग्रेसको तर्फबाट धादिङको खानियाबास गाउँपालिकाको अध्यक्षका उम्मेदवार रणबहादुर तामाङका छोरा हुन् । उनलाई मुद्दा नचलाई छोड्न नेपाली कांग्रेसका सभापति शेरबहादुर देउवाले गृहसचिव लोकदर्शन रेग्मीमार्फत आईजीपी प्रकाश अर्याललाई दबाब दिएको स्रोतको दाबी छ । प्रहरी मुख्यालय स्रोतका अनुसार देउवाको सोही निर्देशनअनुसार आईजीपी अर्यालले एसपी खत्रीलाई टेलिफोनमार्फत मुद्दा केही नरम बनाएर छिटो पेश गरिदिन निर्देशन दिएका थिए । तर, एसपी खत्रीले अनुसन्धानका लागि समय लाग्ने भन्दै अनुसन्धान सकेर मात्रै मुद्दा पेश गर्न सक्ने अडान लिएका कारण उनलाई अकस्मात् हेडक्वार्टर तानिएको बताइएको छ । 

एसपी खत्रीलाई हेडक्वार्टर तानेलगत्तै आईजीपी अर्यालको निर्देशनमा धादिङको निमित्त प्रहरी प्रमुख डीएसपी दीपेन्द्र पञ्जियारले हतारहतार अनुसन्धानको राय प्रतिवेदन तयार गरेर बुधबार अपराह्न जिल्ला सरकारी वकिलको कार्यालय धादिङमा बुझाइसकेका छन् । तर, डीएसपी पञ्जियारले प्रारम्भिक राय बुझाएको विषयमा आफूलाई कुनै जानकारी नभएको भन्दै उम्किन खोजेका छन् । ‘म बाहिर छु, त्यो विषयमा के भएको छ भन्ने कुरामा मलाइ कुनै जानकारी छैन, अनुसन्धान चलिरहेको छ, यो विषय हाम्रो आन्तरिक विषय भएकोले यस विषयमा थप केही बोल्न मिल्दैन,’ पञ्जियारले भने ।  उता जिल्ला सरकारी वकिलको कार्यालय धादिङले प्रहरीबाट आएको प्रारम्भिक रायको आधारमा आधा घन्टाभित्रै अभियोग पत्र तयार गरेर जिल्ला प्रशासन कार्यालय धादिङमा पेश गरेको र धादिङका कामु प्रमुख जिल्ला अधिकारी उमेश कुमार ढकालले हातहतियारसहित पक्राउ परेका अभियुक्तहरु युल तामाङ र जयकुमार तामाङलाई धरौटीमा छोडेका छन् । हतियारसहित पक्राउ परेका आरोपीहरुलाई फास्ट ट्रयाकमा सुनुवाइ गरेर थुनामा पठाउनुपर्ने आरोपीहरुलाई धरौटीमा छोडिएको विषयमा प्रतिक्रिया लिँदा कामु प्रमुख जिल्ला अधिकारी ढकालले आफूले गरेको आदेश सही भएको दाबी गर्दै कोहीकसैलाई चित्ता नबुझेमा अदालत जाने बाटो खुल्ला रहेको भन्दै गैरजिम्मेवारपूर्ण जवाफ दिएका छन् । विश्वस्त स्रोतका अनुसार कामु सिडियो ढकालले गृहसचिव लोकदर्शन रेग्मीको निर्देशनबमोजिम उनीहरुलाई धरौटीमा छाड्ने निर्णय गरेको खुल्न आएको छ । 

त्यसो त अपराध नियन्त्रणमा राजनीतिक दबाब नमान्दा जिल्लास्थित सुरक्षा प्रमुखहरु तानिएको यो नै पहिलो होइन । केही महिनाअगाडि हुण्डी कारोबारी समातेको भन्दै पर्साका तत्कालीन एसपी राजुबाबु श्रेष्ठ र अपहरण तथा शरीरबन्धक मुद्दाको अनुसन्धानको क्रममा संलग्नता खुलेका पूर्वमन्त्री विश्वनाथ साहविरुद्ध मुद्दा दर्ता गरेका सिराहाका तत्कालीन एसपी श्याम ज्ञवालीलाई गृह मन्त्रालय तानिएको थियो । त्यसबेला दुवै एसपी तानिएको विषयमा चौतर्फी आलोचना भएपछि तुरुन्तै उनीहरुलाई कार्यक्षेत्रमै फिर्ता गरिएको थियो ।

बिचार

पूर्वराष्ट्रपति डा रामवरण यादवको सनसनीपुर्ण खुलासा :- मैले तीनपल्ट सेना बचाएको छु

अहिले सम्झिँदा– पहिलो संविधानसभामा जुन पार्टीहरूले सेरेमोनियल राष्ट्रपतिको भरपूर उपयोग गरे, दोस्रो सभामा तिनैले अविश्वास गरेजस्तो लाग्दैन रुतपाईंले यो एकदम ठिक भन्नुभयो । उनीहरूले सत्ताको लागि यसो गरेका हुन् । राष्ट्रपति सेरेमोनियल हो । तर, जुन बेला संसद् रहँदैन, त्यसको अख्तियार पनि राष्ट्रपतिकहाँ गइहाल्छ । बुद्धिजीवी, पत्रकारहरूले मलाई त्यसबेला बढी सक्रिय भएको भनी प्रश्न गर्ने पनि गर्छन् । सेनापतिको विषयमा यो प्रश्न उठ्छ । लोकतान्त्रिक गणतन्त्र जोगाउनका लागि सेनाको विषयमा मैले संविधानलाई अलिकति ‘इन्क्रोच’ (हस्तक्षेप) गरेकै हुँ । तर त्यो बुझेर गरिएको निर्णय थियो । किनभने, देशमा दुई वटा सेना थिए । कम्तीमा शिविरका लडाकुको व्यवस्थापन भइसकेपछि कार्यकारी प्रमुखले ‘फुल फङ्सन’ (पूर्ण भूमिका) गर्न सक्थ्यो । नत्र, कहिलेकाहीँ मैले लगाम लगाउनै पथ्र्यो । मैले यो कुरा प्रधानमन्त्री प्रचण्डलाई स्पष्ट भनिदिएको थिएँ, ‘तपाईं विद्रोही प्रधानमन्त्री, रक्षामन्त्रीले दुई वटा सेनाको समस्या समाधान गर्नुस् । त्यसपछि सेनाको इस्युमा हात हाल्नुस् ।’

प्रचण्डजी, बाबुरामजीहरूले एक डेढ महिनादेखि बाहिर आएर बोल्न थाल्नुभएको थियो । मेरो सोच र उहाँको सोचमा फरक हुन थाल्यो । मैले सिधै त सोधिनँ, तर भित्र–भित्रै होमवर्क गर्न थालिसकेको थिएँ । किनकि, मैले अरू पार्टीहरूको फरक विचार छ भन्ने थाहा पाइरहेको थिएँ । रक्षामन्त्री (बादल) ले प्रधानमन्त्रीकहाँ सेनापतिलाई बोलाएर मलाई सहयोग गर्न (राजीनामा दिन) भनेपछि सेनापतिले मलाई फोन गरेका थिए । दोस्रोपल्ट पनि त्यसैगरी बोलाएर सहयोग गर्न भनेको थाहा पाएपछि मैले (कटवाललाई) राजीनामा नगर्न भनें । म त्यसबेला पत्रकारको एउटा कार्यक्रममा थिएँ । बाटोबाटै सेनापतिको फेरि फोन आयो । मैले जवाफ दिएँ, ‘तपाईंले प्रधानमन्त्री र रक्षामन्त्रीलाई भन्नुहोला– संस्थागत प्रक्रियाबाट राजीनामाका लागि कुरा ल्याउन भन्नुस्, (संस्थागत बाटोबाट ल्याउँदा चिठी राष्ट्रपतिकहाँ आइपुग्छ) अहिले राजीनामा नगर्नुहोला ।’
पुलिस र सशस्त्रको नियमावली परिवर्तन नगर्नुस् भनेर मैले प्रधानमन्त्री राखेर उहाँलाई भनेको थिएँ । उहाँले नमान्ने हुँदा आज पुलिस र सशस्त्रको के दशा छ ? आज सशस्त्र भन्सार र एयरपोर्टमा बसिरहेको छ ।
 

संगठन भित्र हस्पक्षेपका कारण जनताको नजरमा प्रहरीको छवि धमिलो !

उत्कृष्ट प्रहरी व्यवहार त्यतिबेला प्रदर्शित हुन्छ, जब प्रहरीले समाजका सम्पूर्ण वर्ग र समुदायलाई समान ठानी निस्वार्थ व्यावसायिक कार्य सम्पादन गरी आफू सबैको साझा व्यक्ति भएको भन्ने कुरा प्रहरी व्यवहारबाटै प्रमाणित गराउँछ । यो अवस्थामा प्रहरी कार्यसँग जनता सन्तुष्ट रहन्छन् । प्रहरी हाम्रै लागि हो भन्ने जनभावना विकसित हुन्छ । प्रहरी र जनताको पारस्परिक सम्बन्ध प्रगाढ बन्दै जान्छ । आवश्यक सहयोग आदान–प्रदान गर्ने परिपाटी बस्छ । जसका कारण प्रहरी कार्य प्रभावकारी हुने भएकोले समाजको नजरमा प्रहरीको छवि सुध्रन्छ । तर यसविपरीत प्रहरीबाट हुने गरेको एकपक्षीय व्यवहारले प्रहरीको छवि धमिलिएको छ । यसको सुधारका निम्ति प्रहरी व्यवहार लोकप्रिय हुन जरुरी छ ।  यसर्थ राजनीतिक प्रभावको कारण प्रहरीमा परेका उपरोक्त नकारात्मक असरले प्रहरी संगठनलाई नै बदनाम गराउँदै आएको हुँदा यसको अन्त्य गरी नेतामुखी बन्दै गएको प्रहरी सेवालाई जनमुखी बनाउन गृह नेतृत्व र प्रहरी नेतृत्व दुवैले ध्यान पु¥याउनु आवश्यक छ ।

महत्वपूर्ण वेबसाइट

Top