​जनार्दन गृहमन्त्री बनेपछि सचिव र आईजीपीको किन भयो निदहराम


Thursday, 8 Jun, 2017 12:00 AM

काठमाडौं  -ऊर्जामन्त्रीका रुपमा सफल कार्यकाल पूरा गरेका जनार्दन शर्मा गृहमन्त्री बनेका छन् । शर्मा गृहमन्त्री बन्नेबित्तिकै अहिले केही व्यक्तिहरुको निदहराम भएको छ । गृहमन्त्री शर्मा नेकपा माओवादी केन्द्रका अहिलेसम्मकै सबैभन्दा सफल मन्त्री हुन् । उनी युद्धकालमा पनि डेपुटी कमाण्डरसम्म बनेका थिए । हक्की स्वभाव, इमानदार तथा लोकप्रिय छवि बनाएका शर्मा ऊर्जामन्त्री बनेपछि मुलुकमा दिनमा १८ घण्टासम्म हुने लोडसेडिङ हटाउन सफल भएका थिए । सो क्रममा विद्युत् चोरी गर्ने, विभिन्न माफिया र भ्रष्टाचारीलाई कारबाही गरेर तह लगाएका थिए । 

अहिले गृहमन्त्री बनेका शर्माले आफूमातहतका निकायमा भएका गलत क्रियाकलाप, भ्रष्टाचारलगायतको भण्डाफोर गर्ने र केही व्यक्ति कारबाहीको भागिदार हुने सम्भावना देखेपछि उनीहरु आत्तिएका हुन् । गृहमन्त्रालयअन्तर्गत नेपाल प्रहरी पनि पर्ने र प्रहरीमा पछिल्लो समय राजनीति, भ्रष्टाचार, सहकर्मीमाथि हिलो छ्याप्ने काम भइरहेको छ । प्रहरीमा यसअघि भएका काला कर्तुतहरु खुल्ने डरका कारण पूर्वआईजीपी उपेन्द्रकान्त अर्याल, हालका आईजीपी प्रकाश अर्याल, गृहसचिव लोकदर्शन रेग्मी र आईजीपी अर्यालका मामा तथा राष्ट्रिय अनुसन्धान विभागका पूर्वप्रमुख देवीराम शर्मालगायत व्यक्तिहरु त्राहिमाम भएको स्रोतको भनाइ छ । 

आईजीपी अर्याल केन्द्रीय अनुसन्धान ब्युरो (सीआईबी) मा रहँदा ३५ किलो सुनकाण्डमा मुछिएका थिए । उनले गलत रुपमा सुराकी खडा गरेर लाभ लिन खोजेको भन्दै सर्वत्र आलोचना पनि भएको थियो । त्यतिमात्र नभएर तत्कालीन लेखा समितिमा पनि त्यो प्रकरण पुगेको थियो । तत्कालीन लेखा समितिका सभापति थिए जनार्दशन शर्मा । शर्माले अर्यालमाथि छानबिन र कारबाही गर्नसक्ने प्रक्रियामा पुगेपछि रातारात सांसद किनबेच भएको थियो । समितिमा सभापति शर्मा र नेपाली कांग्रेसका धनराज गुरुङ मात्र कारबाही गर्ने पक्षमा भए । अन्य सांसदहरुको असहयोगका कारण अर्याल कारबाहीबाट बचेका थिए । 

पछि त्यो विषय अख्तियार दुरुपयोग अनुसन्धान आयोगमा पुगेको थियो । सोही बेलामा नै पूर्वआईजीपी उपेन्द्रकान्त अर्यालले १ किलो सुन बरामद काण्डमा आफ्नो श्रीमतीलाई नक्कली सुराकी खडा गरेको सम्बन्धमा अख्तियारमा उजुरी परेको थियो । त्यतिमात्र नभएर उपेन्द्रकान्तको पालामा प्रहरीमा ज्याकेट खरिद काण्ड, हालैमात्र म्यादी प्रहरीलाई धेरै रकम उल्लेख गरी थोरै रकम वितरणलगायत काण्डका कारण विगतदेखि वर्तमानसम्मका प्रहरी अधिकृत तथा गृहका सचिव रेग्मी पनि तानिने सम्भावना रहेको स्रोतको भनाइ छ । इमानदार र सदाचारको स्वभाव भएका शर्मा गृहमन्त्री बनेपछि उनले अवश्य नै कारबाही गर्नेछन् भन्ने डरका कारण उक्त व्यक्तिहरुको निदहराम भएको स्रोतको दाबी छ । 

स्रोतका अनुसार उनीहरुले शर्मालाई गृह मन्त्रालयमा आउन नदिन भरमग्दुर प्रयास गरेका थिए । उनीहरुले नेपालस्थित भारतीय दूतावासमार्फत गृहमन्त्रीमा शर्माको साटो माओवादीकै कृष्णबहादुर महरा ल्याउन लबिङ गरेका थिए । यसका लागि भारतसँग राम्रो सम्बन्ध बनाएका कांग्रेसका नेता अमरेश कुमारलाई प्रयोग गरिए पनि उनीहरुको सो प्रयास सफल भएन । स्रोतका अनुसार शर्मालाई भारतीय दूतावासबाट कुरा गर्नका लागि पटकपटक फोन पनि आएको थियो । तर, शर्माले आफू बरु मन्त्री नै नबन्ने तर कसैको प्रभावमा परेर काम नगर्ने मनसायका साथ दूतावासको आग्रहलाई कुनै रेन्स्पोन्स नै नदेखाको स्रोतको भनाइ छ । 

    गृहमन्त्रीमा शर्मा नियुक्त भएपछि सचिव पनि फेरिने र आफ्नो पोल खुल्ने भएकाले कारबाहीबाट बच्न उनीहरुले प्रयास गरेका थिए । आफ्नो प्रयास असफल भएपछि बुधबार गृह मन्त्रालयमा गृहमन्त्री शर्मालाई स्वागत गर्न पुगेका सचिव रेग्मी र आईजीपी अर्याल मलीन मुद्रामा देखिन्थे । गृहमन्त्री शर्माले आफ्नो पहिलो प्रेस सम्मेलनमा नै आफू मातहतका अधिकारीहरुलाई अनावश्यक वक्तव्यबाजी, अन्तर्वार्ता दिन रोक लगाएका छन् । साथै, सिपाहीदेखि जनताको मनोभावनाअनुसार प्रहरी संगठनको कामकारबाही अघि बढाइने भन्दै कडा रुपमा प्रस्तुत भएका छन् । शर्माको कार्यशैलीलाई बुझेका कारण पनि केही व्यक्तिहरुको निदहराम भएको छ ।

Related News

बिचार

उच्च अधिकृतहरूको राजनीतिमा घुन भएर पिसिन लागेका विचरा दुई डिएसपीहरू

हालै दुई जना डिएसपी नवराज सिलवाललाई हराउन खटिए भन्ने समाचार भाइरल भएको छ । मेरो विचारमा यो हुन सक्ला तर त्यसको उद्देश्य ती दुई डिएसपीको महत्वांकाक्षाभन्दा पनि तिनका उच्च प्रहरीका महत्वांकाक्षाले तिनलाई खटाएको हुनुपर्छ । उच्च प्रहरी जो नवराजसँग डराउँछन् वा घृणा गर्छन् वा सिलवालसँग दुश्मनी छ, तिनले आफ्ना स्वार्थका लागि नवराजलाई हराउन खटाएका हुन सक्छन् । तर के ती उच्च प्रहरीको मात्र नवराज हराउने महत्वांकाक्षा होला र रु त्यसमा नवराजको विरोधी दल र नवराज बिगार्न प्रत्यक्ष संलग्न नेता पनि हुन सक्छन् । त्यो नेताका लागि उच्च प्रहरी अधिकृतले डिएसपी खटाएको पनि हुनसक्छ । अझ त्यतिमात्र होइन तस्कर, अपराधी जसका विरुद्ध नवराजले एक्सन गरे तिनीहरू पनि त उनलाई हराउन चाहन्छन् र त्यस्ता अपराधीसँगै उच्च प्रहरीहरूको साँठगाँठ हुन पनि त सक्छ नी । धेरै प्रहरीहरूको पैसा व्यापारीहरूले प्रयोग गरेको र कतिपय अपराधमा संलग्न भई काम गरेको समाचारहरू पनि बाहिर आएकै हुन् । कतिपय समाजमा इमानदार कहलाएका प्रहरी कर्मचारीहरू भित्र–भित्र डरलाग्दो रूपमा पैसा कमाई बसेका छन् भन्ने पनि चर्चा चलेकै छ । अस्पताल, हाउजिङ्ग, बालुवा ठेक्का–पट्टा, शैक्षिक संस्थानलगाएत काममा लगाउने सम्मको कुरा उच्च दर्जाबाट हुने गरेको सुनिएकै हो ।

शेरबहादुर देउवाका प्रतिस्प्रर्धी खगराज भट्टले मतदातालाई लेखे मार्मिक पत्र

म व्याक्तिगत रुपमा कसैलाई गाली र अपमान गर्न चाहान्न् । तर जनताले अब निर्मम निर्णय लिनैपर्छ यसपटक । हो निसन्देह म तेस्रोपटक तपाईको मतका लागि चुनावी मैदानमा छु । मैले डडेल्धुराको विकासका लागि केही योजना सार्वजनिक गर्दा मेरा प्रतिद्धन्द्धी साथीहरुबाट म विरुद्ध नियोजित प्रहार गर्ने,मेरो राजनीतिक जीवनमा दाग लगाउन खोज्ने प्रयास भइरहेकोप्रति म दुख व्यक्त गर्दछु । मैले कहिले पनि पद,पैसा,पावरका लागि कहिल्यै कसैसंग सम्झौता गरिन । बरु यो वा त्यो बाहनामा मलाई निर्वाचन लड्नबाट रोक्ने,पैसालाई खरिद गर्ने र भनेजति पैसा दिने प्रस्ताव कतिपय ठाउँबाट आएकै हो ।
 

महत्वपूर्ण वेबसाइट

Top