मन्त्री बन्न र बनाउन नपाएपछि कांग्रेसभित्र गुटमा पानी बाराबार

पौडेलले चित्त दुखाउँदै भने “शेरेका तिघ्रेले दुख दिए”


Tuesday, 8 Aug, 2017 12:00 AM

काठमाडौं - कांग्रेस सभापति शेरबहादुर देउवाले आफ्नै नेतृत्वको सरकार बिस्तारका क्रममा गुट÷उपगुटको व्यवस्थापन गर्न नसक्दा र मन्त्रीका आकांक्षीको चित्त बुझाउन नसक्दा खटपट भएको छ । देउवाले पछिल्लो पल्ट बिस्तार गरेको मन्त्रीपरिषद्मा पर्न मरिहत्ते गर्ने नेताहरु मन्त्री बन्न नपाएपछि चित्त दुखाउँदै पार्टी नेतृत्वलाई सत्तो सराप समेत गर्न थालेका छन् ।

देउवाले प्रधानमन्त्री भएको डेढ महिनापछि साउन ११ गते मन्त्रीपरिषद् बिस्तार गर्दा पार्टी संस्थापन पक्ष र असन्तुष्ट पक्षमा समेत बिबाद भएको हो । नेता रामचन्द्र पौडेलले कांग्रेसले मन्त्रिपरिषद्मा पाउने मन्त्रालयमध्ये आफ्नो गुटलाई ४० प्रतिशत पाउनै पर्ने अडान लिएका कारण र आफ्नै गुटबाट मन्त्रीका आकांक्षी धेरै भएपछि देउवाले ढिलो गरी मन्त्रीपरिषद् बिस्तार गरेका थिए ।

देउवाले गुट र उपगुटका मन्त्रीका आकांक्षीलाई चित्त बुझाउँदा स्थानीय तहमा सबैभन्दा बढि स्थान जिताउन सफल मोरङ, गोरखा र नवलपरासीबाट एक जनालाई पनि मन्त्री बनाएनन् । यि जिल्लाबाट कांग्रेसले नौं, नौं वटा स्थानीय तहमा जित हासिल गरेको थियो ।

पुरानो संस्थापन पक्ष (कोइराला—पौडेल) लाई छोडेर पछिल्लो डेढ बर्षदेखि सभपाति देउवाको पक्षमा उभिएका र पार्टी संसदीय दलको प्रमुख सचेतक समेत भएका चिनकाजी श्रेष्ठ मन्त्रिपरिषद्मा पर्न नसक्दा सबैभन्दा धेरै चित्त दुखाउनेमा परेका छन् । उनले अन्य दल एमाले र माओवादीका संसदीय दलका सचेतकहरु चार जनासम्म मन्त्री हुँदा पनि आफ्नो पालो नआएको भन्दै चित्त दुखाएका थिए । उनले निरंकुश पञ्चायती व्यवस्थामा समेत यस्तो मानसिक तनाव नभोगेको भन्दै सभपाति तथा प्रधानमन्त्री देउवालाई पञ्चायती व्यवस्थाले सृजना गरेको यातना भन्दा बढी पीडा दिने व्यक्तिको रुपमा चित्रित गरेका छन् ।

देउवाकै गुटका यूवा नेता भिष्मराज आङदम्वेलाई पनि देउवाले अन्तिम समयमा आएर मन्त्री नबनाएकोमा ठूलै चित्त दुखाए । उनले आदिवासी जनजाति भएर मात्र होइन, चाकडि र चप्लुसी गर्न नसक्ने आफ्नै कमजोरीलाई धिक्कार्दै थिए, आफ्ना नजिकका साथिहरुसँग ।

पार्टीको १३ औं महाधिवेशनमा पुरानो संस्थापन पक्षलाई छोडेर देउवालाई साथ दिन आएका पर्बतका अर्जुनप्रसाद जोशीले देउवालाई सभपातिमा जिताउन राम्रै भूमिका खेलेका थिए । उनी पार्टीको जनसम्पर्क समितिका संयोजकको हैसियतले देउवाको पक्षमा माहौल बनाएका थिए, तर उनी नै केन्द्रीय सदस्यमा उम्मेदवारी दिएर देउवा गुटबाट पराजित भए । केन्द्रीय सदस्य बनाइएका जोशीले मन्त्रीपरिषद् बिस्तार हुनु अघिल्लो साँझबाट मन्त्री हुनेको लिस्टबाट आफ्नो नाम काटिएकोमा खुवै चित्त दुखाएका छन् । उनले पार्टी महाधिवेशमा देउवालाई लगाएको गुन सम्झना नभएर होला, आफू मन्त्री बन्न सकिन भन्दै प्रतिक्रिया दिँदै हिँडेका छन् ।

श्रेष्ठ, आङदम्वे र जोशीलाई मन्त्री बनाउने भनेर अन्तिममा धोका दिए पछि कोही पनि सपथ समारोहमा गएनन् । श्रेष्ठ दौरासुरुवाल लगाएर सपथ भनेर जान लागेकाले घरमा थचक्क बसे भने आङदम्वे ललितपुरको गोदाबरी तिर लागेका थिए ।

पार्टीका पूर्वउपसभापति रामचन्द्र पौडेल गुटमा भने मन्त्री बन्ने बिषयमा ठूलै पहिरो गएको छ । पौडेल गुटमा असन्तुष्टि यति चुलिएको छ कि, उनकै गुटबाट महामन्त्री बनेका डा. शसांक कोइराला राम्रोसँग पौडेलसँग दिल खोलेर बोल्दैनन् । उनलेको चित्त दुखाई मन्त्री बन्न नपाएकोमा भन्दा पनि सभापतिलाई असहयोग गर्दै गुट बलियो बनाउने र आफ्नो सल्लाह नमान्ने भन्ने बिषयमा बढी थियो ।

सभापति देउवाले जेठ २३ गते प्रधानमन्त्रीको सपथ खाएकै बेला महामन्त्री डा. कोइरालालाईा उपप्रधानमन्त्रीसहित एउटा मन्त्रालय दिन चाहन्थे । तर, पौडेलले नै रोकेको थिए । देउवा त्यतिबेलै मोरङका महेश आचार्यलाई सञ्चार मन्त्री बनाएर क्याविनटमा लान चाहन्थे । पौडेलको अबरोधले मन्त्रिपरिषद्मा जान नपाएपछि कोइराला र आचार्य त्यसैबेलादेखि पौडेलसँग चिडिएका छन् ।

पछिल्लो पटक मन्त्रीपरिषद् बिस्तार गर्दा महामन्त्री कोइरालाले दीपक गिरीलाई पुन मन्त्रिपरिषद्मा लैजाने प्रस्ताव गरेका थिए तर पौडेलले मञ्जुरी दिएनन । उनले महिलाको समेत प्रतिनिधित्व हुने भन्दै झापाकी नेतृ तथा विगत चार बर्षदेखि अचेत अवस्थामा वाँचीरहेका नेता चक्र बास्तोलाकी भाञ्जी सरिता प्रसाईंलाई मन्त्री बनाउने प्रस्ताव गरे । कोइरालाको यो प्रस्तावलाई समेत पौडेलले लत्याएपछि उनले सबै निर्वाचितलाई मन्त्री बनाउने भन्दै काश्कीका यज्ञ थापा र बर्दियाका सञ्जय गौतमको नाम अघि सार्नु परेको थियो ।

पार्टीको केन्द्रीय कार्य सम्पादन समिति गठन गर्दा पौडेलले आफूहरुको नाम कटाएको भन्दै पाका नेता आनन्दप्रसाद ढुंगाना र डा. शेखर कोइराला तीन महिनाअघि देखि नैं पौडेलसँगको सम्बन्धबाट टाढिएका छन् । पछिल्लो समय मन्त्रिपरिषद् बिस्तारमा पौडेलले सल्लाह गर्न समेत बोलाउन छाडेपछि ढुंगाना र डा. शेखर पौडेलसँग रुष्ट बनेका छन् ।

नेता पौडेलले मन्त्री बनाउँछु भनेर पनि अडान लिन नसकेको भन्दै पौडेल गुटकै नेता बलबहादुर केसी यतिवेला पौडेलसँग चिढिएका छन् । यहाँसम्मकी केसीले अब मलाई मन्त्रि बनाउन देउवालाई दबाब दिन नसकको परिणाम देखाइदिने चेतावनी समेत दिएका छन् । उनले पौडेललाई भेटेर आफ्नो गुटबाट पाँच जनालाई यो यो मन्त्रालय देउ नत्र मन्त्रीपरिषद् नैं बहिस्कार गर्छु भनेर धम्क्याउन पौडेललाई उकासेका थिए । केसीको नाम पौडेलले सिफारिस गर्नासाथ चिढिने गरेका देउवाले अर्को नाम सिफारिस गर्न भनेका थिए । तर पौडेलले केसीको बिकल्पमा महामन्त्री कोइरालासँग सल्लाह गरेर नाम दिएका थिए । केसीले मन्त्रीपरिषद्मा आफ्नो नाम नपठाए पौडेललाई ठीक पारिदिने चेतावनी दिएको र पूर्व महामन्त्री प्रकाशमान सिंहले राजेन्द्र केसीलाई मन्त्री नबनाए पौडेल गुट नैं छाडिदिने धम्की दिएका थिए । केसी र सिंहको चेतावनी र धम्कीबाट अवाक भएका पौडेलले आफ्नै गुटका केही सांसदसँग “शेरेका तिघ्रेहरुले मलाई सताउन थाले कसरी सम्झाउनु होला” भनेर निकै चित्त दुखाएका थिए ।

नेपाली कांग्रेसबाट अलग भएर नेपाली कांग्रेस  प्रजातान्त्रिक गठन गर्दा सिंह र केसी दुवै जना देउवाका दाहिने हात थिए । दुवै जना लाठि मुंग्री र हातपात गर्नपनि पछि नपर्ने लडाकु स्वभावका भएकोले पौडेलले दुवैलाई तिघ्रेको उपमा पौडेलले सिंह र केसीलाई देउवाले  आफूलाई दुख दिन पठाएको हो कि क्या हो भनेर पाँच नम्वर प्रदेशका केसी सांसदसँगको भेलामा आशंका पनि व्यक्त गरेका थिए ।

यता खुमबहादुर खड्का गुटबाट मन्त्री बन्ने प्रयास गरेका संखुवासभामा दीपक खड्का, दाङका बुद्धिबहादुर भण्डारी, पार्वती डिसी चौधरी  खड्कासँग चिढिएका छन् । उनीहरु मन्त्रीका आकांक्षी थिए ।

कृष्णप्रसाद सिटौला गुटबाट चर्चा बटुलेका गगन थापाले पनि आफू पुन मन्त्री हुन पाउनु पर्यो भन्दै सिटौलाई दबाब दिएका थिए । उनले माओवादी केन्द्रबाट राम्रो काम गरेको भन्दै जनार्दन शर्मा मन्त्री हुन पाउने म किन नपाउने भन्दै सिटौलासँग घुर्की पनि देखाएका थिए । पछि उनले अनलाईन मिडिया मार्फत आफूले स्वास्थ्य मन्त्री हुँदा धेरै राम्रो काग गरेको तर स्वास्थ्य प्रतिष्ठानहरुको उपकुलपति नियुक्ती गर्दा भने सिटौलाले नैं नेतृत्व लिएको भन्दै दोष थोपरेको थिए । सिटौलाबाट सम्भावना नदेखेका थापा पछि देउवा र ससुरा अर्जुननरसिंह केसीको शरणमा समेत पुगेका थिए रे । तर उनलाई देउवा र ससुरा केसी दुवैले वास्ता नगरेपछि थापा थच्किएर बसेका थिए ।

बिचार

उच्च प्रहरी साथीहरूले बुझ्नु पर्छ, साथी खुसीका श्रोत हुन्

हामीले यसो गर्दा हाम्रो एउटा साथीको जागिर जान्छ भन्ने संवेदना उनीहरूमा पटक्कै भएन । बिल्कुलै संवेदना शून्य । न माया, न दया, केवल रिस, ईष्र्या, डाहा, छटपटी मानौँ जंगली जनावर झै हिंस्रक । आफ्नै ब्याचको एउटा साथी जो यो समयमा पदोन्नती भएन भने जागिरबाटै बाहिरिन सक्छ, त्यो अवस्था देख्दा हिजो सँगै थालमा खाएका एउटै व्याचका साथीहरूलाई पनि पीडा हुनुपर्ने हो तर यस्तो हुँदो रहेनछ । उल्टो त्यसलाई अवकाश गराई आफु त्यो पदमा जाने होड पो चल्दो रहेछ । मैले आफ्नै आँखाले देखेँ कि मानिस एक तह पदोन्नतिका लागि कतिसम्म निच हुन सक्दा रहेछन् । तर फेरि सोच्छु यी व्यक्ति कुनै बेला मेरा साथी थिए, हामी सँगै हास्थ्यौँ, खेल्थ्यौँ, रमाउथ्यौँ । फेरि आज यिनीहरूनै मलाई जागिरबाट निकाल्न किन यति धेरै उद्दण्ड किन भए ? के यी व्यक्ति नै खराब थिए ? वा म खराब थिएँ ? वा त्यो पद खराब थियो जुन पदले साथीहरूलाई नै दुश्मन बनायो ? अन्तमा म निष्कर्षमा पुग्छु कि वास्तवमा त्यो पद नै खराब थियो र त्यो पदमा पुग्ने चाहनाले नै उनीहरूलाई साथीसँग दुश्मन हुनमात्र तयार पारेन बल्की अनैतिक भएर आत्मसम्मान गिराउनसमेत तयार बनायो । म फेसबुक हेर्दै थिएँ ।

समाचार स्रोतको संरक्षण

पत्रकारलाई समाचारको स्रोत खुलाउन नपर्ने उन्मुक्ति किन दिइयो भन्नेतर्फ पहिला चर्चा गरौँ । एउटा कानुन व्यवसायीले आफ्ना सेवाग्राहीलाई दिएको कानुनी परामर्श अदालतमा समेत खुलाउन बाध्य हुँदैन । यस्तो कार्य प्रिभिलेज कम्युनिकेसन हो र यो गोप्य विषय हो । वकिलले के राय दियो भन्ने कुरा न त कानुन व्यवसायीले बताउन पाउँछ न त पक्षले नै । सांसदले संसद्मा बोल्दा कुनै रोकतोक नलाग्ने कारण पनि त्यही हो । संसद्मा बोल्दा कारबाही हुने अवस्था आउने हो भने स्पष्ट रूपमा बोल्न सक्दैन भनेर नै संसद्मा दिएको अभिव्यक्तिका कारण कुनै सजाय गरिनेछैन भन्ने व्यवस्थासहितको विशेषाधिकार राखिएको हो । चिकित्सकले उपचारका क्रममा दिएको स्वास्थ्य सल्लाह र रोगबारे सार्वजनिक गर्न पाउँदैन किनभने एक त ती बिरामी व्यक्तिको गोपनीयताको अधिकार छ भने अर्कातिर डाक्टरको पेसागत आचारसंहिता । त्यस्तो गोपनीयता सार्वजनिक गर्न थाल्ने हो भने चिकित्सकप्रतिको विश्वास धराशयी हुनजान्छ ।

महत्वपूर्ण वेबसाइट

प्रशासन View More..

Top